ҲАЙАТИ ПАРЛУМОНИИ ТОҶИКИСТОН АЗ БАЛӢ БОЗДИД МЕНАМОЯД

Душанбе, 9 декабр.(АМИТ «Ховар», Марзия Саидова).-Ҳайати парлумонии Ҷумҳурии Тоҷикистон таҳти роҳбарии Раиси Маҷлиси намояндагони Маҷлиси Олии ҷумҳурӣ  Шукурҷон Зуҳуров 13 декабри  соли 2010 ба Ҷумҳурии Индонезия меравад.Сафари расмии Шукурҷон  Зуҳуров ба Индонезия бо даъвати Раиси парлумони ин кишвар сурат мегирад. Муҳаммадато Султонов котиби матбуотии Маҷлиси намояндагон ба АМИТ «Ховар» иттилоъ дод, ки дар ҷараёни  сафар Шукурҷон Зуҳуров дар Ҷакарта бо вазири  корҳои хориҷии Индонезия, раиси палатаи намояндагони  ин кишвар, бо раиси Конгресси Индонезия, раиси Шӯрои минтақавии  намояндагон,  вазири маорифи  миллӣ ва дигар роҳбарону намояндагони баландпояи Индонезия вохӯрию мулоқот менамояд.                      Дар назар аст, ки дар ҷараёни мулоқот ҷонибҳо масъалаҳои тақвияти робитаҳои байнипарлумонии Тоҷикистону Индонезия, тавсеаи ҳамкориҳои иқтисодию тиҷоратӣ, кишоварзӣ ва туризму маорифро баррасӣ намоянд. Интизор меравад, ки  ҳайати парлумонии Тоҷикистон аз шаҳри Балӣ боздид намуда, бо ҳокими ин шаҳр мулоқот хоҳанд кард.