ҲАМАРӮЗА БЕШ АЗ 8 МЛН. КВТ/СОАТ НЕРӮИ БАРҚ

   Душанбе, 23 декабр. (АМИТ «Ховар»Лаззат Диловарзод).- Бино ба гуфти сармуҳандиси шабакаҳои барқи шаҳрӣ ( горэлектросет) Абдулваҳоб Ғиёсов, ҳамарӯза ба шаҳри Душанбе беш аз 8 млн. кВт/соат нерӯи барқ ворид мегардад, ки ин нисбат ба давраи тобистон 2,5 маротиба зиёд аст. Талаботи аҳолӣ  ба нерӯи барқ дар фасли зимистон   ду баробар афзоиш меёбад ва аз меъёр зиёд истифода намудани нерӯи барқ боиси аз кор баромадани даҳҳо трансформаторҳо     гардида,  сабаби сар задани  арзу шикояти сокинони шаҳр дар бораи қатъ шудани барқ ба манзилҳои истиқоматӣ мегардад.    Айни замон дар шаҳри Душанбе беш аз 1100 нуқтаҳои трансформаторӣ (зеристгоҳҳои барқӣ) вуҷуд дорад, ки 10 фоизи он таъмири ҷориро мехоҳад. Рӯзҳои наздик таъмири бонавбати онҳо     амалӣ мегардад ва набудани барқ дар манзили   шаҳрвандон маънои аз рӯи  лимит додани барқро надорад.    Бо вуҷуди он ки аксари сокинони пойтахт пардохти нерӯи барқро сари вақт ва мунтазам ба ҷо меоранд, вале қарзи дебитории онҳо чун пештара 7 млн. 200 ҳазор сомонӣ боқӣ мондааст,- мегӯяд А. Ғиёсов.