Ҳ.У. ЗАХИЛВОЛ: «МО ТОҶИКИСТОHРО АЗ ХУД ҶУДО НАМЕДОНЕМ»

Душанбе, 16 декабр. (АМИТ «Ховар», Дилшодаи Ҷонмард). – «Мо  аслан Тоҷикистонро кишвари аз худ ҷудо фикр намекунем», — гуфт пас аз мулоқот бо Президенти Ҷумҳурии Тоҷикистон Эмомалӣ Раҳмон вазири молияи Афғонистон Ҳазрат Умар Захилвол.  Ба гуфти ӯ муҳаббате, ки байни Тоҷикистону Афғонистон ва алоқамандие, ки миёни мардуми  ин ду кишвар  ҳаст, аслан фикр намекунем, ки мо ду  кишвар  ҳастем. «Дар мулоқоти имрӯзаи мо бо раисҷумҳури Тоҷикистон Эмомалӣ Раҳмон масоили ҳамкории Тоҷикистону Афғонистон, бахусус дар мавриди тиҷорати ду кишвар, бунёди роҳҳои оҳану мошингард, доир ба кашидани хатҳои баландшиддати интиқоли нерўи барқ баррасӣ гардиданд», — идома дод вазири молияи Афғонистон. Ҳазрат Умар Захилвол тазаккур дод, ки ҳайати баландпояи Афғонистон дар ин мулоқот бо Сарвари давлати Тоҷикистон тадбиқи лоиҳаҳои муҳим, бахусус лоиҳаҳои транзитиро, ки ҳам барои Афғонистон ва ҳам барои Тоҷикистон муҳиманд, муҳокима намуда, роҷеъ ба лоиҳаҳои амалишавандаи дар мулоқоти раисҷумҳуриҳои ин ду кишвари дӯст муҳокима ва баррасишуда  табодули назар карданд. «Мо аз ин сафар дар Тоҷикистон хеле муваффақ хоҳем шуд, зеро ҳидоятҳое, ки Эмомалӣ Раҳмон мекунанд ҳидоятҳои раисҷумҳури Афғонистон аст ва ин ҳидоятҳо ҳамеша бар он таъкид мекунанд, ки дар Афғонистон низ сулҳу субот ва оромию тинҷӣ ҳукмфармо гардад ва равобити ҳасана ва дӯстонаи мо бо бародарони тоҷик аз ин ҳам бештару хубтар ва  фарохтар рушд кунад, то мо тавонем лоиҳаҳои муштаракро ба манфиати давлат ва мардумамон амалӣ созем», — мӯътақид аст Захилвол. Вай зикр намуд, ки имрӯз дар Тоҷикистон ва Афғонистон лоиҳаҳои муштарак амалӣ мешаванд, ки ба нафъи ҳарду кишвар равона шудаанд ва имконоти зиёд низ мавҷуд аст, ки мо бояд онҳоро ба фоидаи кишварҳоямон истифода барем, то тавонем ҳадафҳои аслии роҳбарони   кишварҳоямонро   амалӣ созем.