ЭМОМАЛӢ РАҲМОН А.ЛУКАШЕНКОРО ТАБРИК НАМУД

Душанбе, 22  декабр. (АМИТ «Ховар). – Президенти  Ҷумҳурии Тоҷикистон  Эмомалӣ Раҳмон  21  декабри соли равон  бо Александр  Лукашенко  телефонӣ  сӯҳбат  карда, ӯро  ба  муносибати  бори  дигар ба  мансаби олии  Президенти  Ҷумҳурии  Белорусия  интихоб шуданаш  самимона  табрик  намуд. «Ғалабаи  комили  Шумо  дар  интихобот   аз  дастгирии  сиёсате  шаҳодат  медиҳад, ки  таҳти  роҳбарии  Шумо  барои шукуфоӣ  ва  ободии  Белорусияи  бо мо  дӯст ва  зиндагии  шоистаи   халқи  мамлакататон  равона  карда шудааст», — гуфт  сардори  давлати  Тоҷикистон.  Мухбири  АМИТ «Ховар»  хабар  медиҳад, ки  Эмомалӣ  Раҳмон  қаблан  ба  ин  муносибат  ба  унвони Александр  Лукашенко  барқияи  шодбош  фиристода буд. Дар  он  аз ҷумла  гуфта  мешавад:  «Дар  Тоҷикистон  Шуморо  ҳамчун  ҷонибдори  қотеи  рушди ҳамаҷониба  ва  муттасили  шарокату  ҳамкории  мамлакатҳоямон  мешиносанд, ки  муносибатҳои таърихии  дӯстона  доранд. Боварии  комил  дорам, ки  ҳамкории  серсоҳа  ва  доманадори  Тоҷикистону  Белорусия ҷавобгӯӣ  манфиатҳои  куллии   халқҳои  мамлакатҳоямон  буда,  дар  оянда  соҳаҳои  навро  фаро  гирифта, боз  ҳам бештар  вусъат  пайдо  мекунанд. Ин  ҷониб тайёрам, ки  барои  ин  ҳамроҳи  Шумо  тамоми  тадбирҳои  заруриро  андешида ва  амалӣ  созам.     Ба  Шумо,  Александр  Григоревичи  мӯҳтарам,  саломатии  комил,  хушбахтӣ ва дар  фаъолияти  минбаъдаатон  комёбиҳои нав  орзу  менамоям».