МАҲФИЛИ ЗИДДИКОРРУПСИОНӢ ДАР «ОРИЁНО»

Душанбе, 9 декабр. (АМИТ «Ховар», Дилшодаи Ҷонмард).-Ташаккули фарҳанги маънавию сиёсӣ ва маърифати ҳуқуқии   шаҳрвандон, махсусан наврасону ҷавонон аз омилҳои асосии пешгирикунандаи зуҳуроти коррупсионӣ дар шароити имрӯза ба ҳисоб меравад. Бо назардошти ин нукта ва бо мақсади  густариши ҷаҳонбинии зиддикоррупсионӣ ва дастгирии ҷавонони соҳибистеъдод Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон бахшида ба Рӯзи умумиҷаҳонии мубориза бар зидди коррупсия санаи 9 декабри соли равон  дар маркази фарҳангии ҷавонон «Ориёно» чорабинии тарғиботиву иттилоотӣ ва фарҳангиро  бо   иштироки 300 нафар ҷавонони касбу кори гуногун, намояндагони расонаҳои хабарӣ ва сарояндагони ҷавон доир намуд. Дар чорабинӣ нахуст Раиси Кумитаи   ҷавонон, варзиш ва сайёҳии назди Ҳукумати Ҷумҳурии Тоҷикистон Маликшо Неъматов ва намояндаи Агентии назорати молиявии мубориза бо коррупсияи Ҷумҳурии Тоҷикистон дар мавриди зуҳуроти коррупсионӣ ва оқибатҳои ногувори он суханронӣ намуда, аз ҷавонон   даъват ба амал оварданд, ки алайҳи ин падидаи   нанговар  пайваста мубориза бурда, барои мавҷудияти фазои мусоиди зиддикоррупсионӣ саъю талош варзанд.