ЁДЕ АЗ ТАНБӮРНАВОЗИ МУМТОЗ

Шаҳринав, 28 декабр. (АМИТ «Ховар», Ҳ. Рабиев). – Дар  толори  маҷлисгоҳи  Мақомоти  иҷроияи  ҳокимияти  давлатии  ноҳияи  Шаҳринав  бахшида ба  105 – солагии машшоқи мумтоз ва  сарояндаи маъруфи  тоҷик мулло Абдуҷаббори Танбӯрӣ маҳфили бошукӯҳи илмию  фарҳангӣ баргузор гардид. Ҷамъомадро бо  сухани ифтитоҳӣ муовини раиси ноҳияи  Шаҳринав Мусаллама Қодирова ҳусни  оғоз бахшид. Сипас,  шахсиятҳои  маъруф Ҳоҷӣ Ҳусайни Насриддин, Қаҳҳор Розиқов,  Султонмуроди  Одина, Абдуҳофиз Қодиров, Парвиз Пӯлодӣ  ва  дигарон аз  хизматҳои  шоистаи  мулло Абдуҷаббори Танбӯрӣ ёдовар  гардиданд. Аз  ҷумла зикр намуданд, ки  Абдуҷаббори Танбӯрӣ дар  рӯзҳои даҳаи  адабиёт ва  санъати  тоҷик  дар  соли 1941 дар  шаҳри  Маскав  ширкати фаъолона  дошта,  сазовори  таҳсину  офаринҳо гардидааст. Ҳамчунин хизматҳои  ӯ дар  рушди  санъати  тоҷик  ва  тарбияи  санъаткорони  ҷавон  зикр  гардид. Ширкати  санъаткорони  шинохта Фурқати  Саид,  Убайдуллои  Каромат,  Шамсиддини  Муҳиддин ва  Карими Назар ба маҳфил  шукӯҳу  шаҳомат бахшид.