ЗАДУХӮРД ДАР МАРЗИ ТОҶИКИСТОНУ АФҒОНИСТОН

Душанбе, 9 декабр. (АМИТ «Ховар», Мавҷуда Анварӣ).-Дирӯз тахминан соати 13.00 ҳангоми гузаронидани чораҳои фаврӣ-ҷустуҷӯӣ  байни кормандони шӯъбаи корҳои дохилии ноҳияи Шӯробод ва 5 нафар қочоқчӣ, ки сокинони вулусволии «Роғ»-и вилояти Бадахшони Давлати Исломии Афғонистон мебошанд, задухӯрд ба амал омад. Маълум гардид, ки дар мавзеъи «Таваргон»-и ҷамоати деҳоти Шӯробод дар масофаи 30 км қочоқчиён марзи Ҷумҳурии Тоҷикистонро ғайриқонунӣ убур намудаанд. Дар натиҷаи задухӯрди мусаллаҳона нашъафурӯшони афғон ба тарафи сарҳади Афғонистон фирор намуданд. Ҳангоми азназаргузаронии ҷойи ҳодиса аз 2 махфигоҳи онҳо дар 13-борхалтаи селофанӣ 174 кг. 370 грамм маводи нашъадори бангдонаи хушконидашуда дарёфт ва мусодира  гардид. Нисбат ба ин ҳодиса парвандаи ҷиной боз шуда тафтиш идома дорад. Дар ин бора ба хабарнигори АМИТ «Ховар» сардори маркази матбуоти ВКД ҶТ Маҳмадулло Асадуллоев хабар дод.