ИФТИТОҲИ КОРХОНАИ НАВИ ДОРУСОЗӢ

   Душанбе, 6 январ. (АМИТ «Ховар», Кристина Эрлих). – Дар Тоҷикистон дар ҳамкорӣ бо Ҷамъияти масъулияташ маҳдуди «Тиб барои шумо» заводи нави дорусозӣ ифтитоҳ гардид, ки дар он зиёда аз 64 номгӯй маводи доруворӣ истеҳсол мешавад. Дар ин бора ба хабарнигори АМИТ «Ховар» сардори маркази матбуот ва маҳсулоти тиббии Вазорати тандурустии ҶТ Салим Абдулазизов хабар дод.  Тибқи иттилои манбаъ дар сохтмон ва муҷаҳҳазгардонии заводи нави дорусозӣ 13 миллион сомонӣ маблағ сарф шудааст. Маҳсулот ва таҷҳизоти махсусгардонидашуда барои фаъолияти завод аз ҷумҳуриҳои Эрон, Чин ва Ҳиндустон оварда шудаанд.   Ифтитоҳи заводи нав имконият дод, ки боз 150 нафар бо ҷойи кор таъмин гарданд. Дар завод 4 сех фаъолият мекунад: сехи инфузионӣ, сехи маҳлулҳо, сехи маводи доруворӣ дар заминаи маҳлулҳои спиртӣ ва сехи маводи доруворӣ дар асоси гиёҳу растаниҳои шифобахш.   Ғайр аз ин дар завод маводе истеҳсол мешаванд, ки аз ҷониби олимони тоҷик ихтироъ шудаанд, чун «Тимосин» ва «Тимогар».   «Айни замон бо дигар ширкатҳои дорусозӣ оид ба ташкил намудани заводҳои иловагӣ ва сехҳои истеҳсоли маводи доруворӣ гуфтушунид идома дорад», иброз намуд манбаъ.