А.Раҳмонов: «ТВ ва радио-инъикосгари рӯйдодҳои муҳим»

Душанбе, 15 июл. (АМИТ «Ховар», Дилшодаи Хайруллоҳ).- Дар инъикоси тамоми тағйироту дигаргуниҳое, дар ҳаёти ҷомеа ба вуқӯъ пайвастаанд, саҳми кормандони телевизион ва радиои Тоҷикистон калон аст.Тавре Раиси Кумитаи телевизион ва радиои назди Ҳукумати ҶТ Асадулло Раҳмонов ба хабарнигорони ВАО иброз дошт, дар ҳамаи шабакаҳо ҷараёни сафари давлатии Президенти Ҷумҳурии Тоҷикистон Эмомалӣ Раҳмон ба хориҷ ва дохили мамлакат, ҳамчунин дигар ҳодисаву рӯйдодҳои муҳими кишвар сари вақт ва оҷилӣ инъикос гардиданд.Дар ноҳияи Нуробод бунгоҳи хабарии Муассисаи давлатии «Ҷаҳоннамо» ба фаъолият оғоз кард, ки он бо таҷҳизоти ҳозиразамони танзим ва дигар техникаи зарурӣ таъмин мебошад,- афзуд А .Раҳмонов.Ба қавли А. Раҳмонов «дар давоми 6 моҳи соли равон дар кинотеатрҳои назди корхонаҳои фаръӣ-давлатии шаҳру навоҳии Конибодом, Исфара, Ашт ва Бобоҷон Ғафурови вилояти Суғд, кинотеатри Лоҳутии шаҳри Қурғонтеппа ва кинотеатрҳои ноҳияҳои Панҷ, Қумсангир, Ёвон, Фархор, Ҳамадонии вилояти Хатлон, ноҳияҳои Файзободу Ваҳдат ҳамарӯза намоиши филмҳои ватанӣ ва дигар чорабиниҳои фарҳангӣ доир карда шуданд».Ҳамчунин қайд гардид, ки дар ин муддат асарҳои тозаэҷоди ҳунармандони дастаҳои ҳунарии «Дарё», «Шашмақом», «Фалак», «Гулрез» ва «Ориё» тариқи радиову телевизион ва дар толорҳои консертӣ пешкаши ҳаводорони санъат гардиданд.Кумита барои беҳтарин шеър, оҳанг ва иҷрокунанда озмун эълон кардааст. Бовар дорем, ки дар он дастаҳои ҳунарӣ на танҳо фаъолона иштирок мекунанд, балки дар ташкил ва гузаронидани он низ саҳми босазо мегузоранд,- гуфт Асадулло Раҳмонов дар хотима.Мавриди зикр аст, ки озмуни мазкур дар арафаи ҷашни Истиқлолият ҷамъбаст мешавад.