Киҳо кӯмаки унвонии иҷтимоӣ мегиранд?

Душанбе, 15 июл. (АМИТ «Ховар», Дилшодаи Хайруллоҳ).- Тибқи иттилои Вазорати меҳнат ва ҳифзи иҷтимоии ҷумҳурӣ пардохти ҷубронпулӣ ва кӯмакпулиҳо ба оилаҳои камбизоат ягона карда шуда, пардохти кӯмакҳои унвонии иҷтимоӣ аз ҷониби мақомоти давлатии шуғли аҳолӣ барои як оила дар як сол ба андозаи 400 сомонӣ таъин ва ҳар се моҳ пардохта мешавад.Агентии давлатии ҳифзи иҷтимоӣ, шуғли аҳолӣ ва муҳоҷират дар соли 2011 тибқи нақшаи хароҷотии буҷети ҷумҳуриявӣ ҷиҳати пардохти кӯмакҳои унвонии иҷтимоӣ ба оилаҳои камбизоат дар шаҳри Истаравшан ва ноҳияи Ёвон 4 млн. 149,8 ҳазор сомонӣ маблағ пешбинӣ кардааст.Лозим ба зикр аст, ки то якуми июли соли ҷорӣ барои бархурдор шудан аз кӯмакҳои унвонии иҷтимоӣ 16 ҳазору 931 нафар шаҳрванд муроҷиат намудаанд, ки ба 6 ҳазору 621 нафари онҳо кӯмаки унвонии иҷтимоӣ таъин ва 1 млн. 252,1 ҳазор сомонӣ пардохт гардидааст.Ҳамчунин, ба 164 ҳазору 131 нафар хонанда 3 миллиону 282,6 ҳазор сомонӣ ва ба 180 ҳазор оилаи камбизоат ба маблағи 7 миллиону 898, 6 ҳазор сомонӣ ҷубронпулӣ пардохта шудааст. Аз ҷумла, барои истифодаи қувваи барқ 7 миллиону 543 ҳазор сомонӣ ва истифодаи гази табиӣ-228,6 ҳазор сомонӣ маблағ пардохт шудааст.