Ғалабаи пахтакорони шаҳринавӣ

Шаҳринав, 12 октябр. (АМИТ «Ховар», Ҳотам Рабиев).-Пахтакорони  ноҳияи Шаҳринав 3 ҳазор тонна пахта ҷамъ оварда, иҷрои нақшаро бомуваффақият таъмин намуданд. Онҳо ин миқдор пахтаро аз майдони 1 ҳазору 476 гектар ғундоштанд, ки ҳосилнокии ҳар гектар 21 сентнериро ташкил медиҳад.Қиммат шудани нархи нахи пахта дар бозори ҷаҳонӣ деҳқононро рӯҳбаланд карда, онҳо тавассути ташкили дурусти кор  ба ин муваффақият ноил гаштанд. Деҳқонон имсол масоҳати кишти пахтаро 300 гектар зиёд намуданд.Дар ин ғалабаи меҳнатӣ саҳми деҳқонони хоҷагиҳои ба номи  И.Меликмуродов, «Наврӯз», «Аҷам», «Ҷамшед» ва дигар хоҷагиҳо хеле калон аст. Деҳқонон дар саҳро ҳанӯз ҳам фаровон будани ҳосили пахтаро ба инобат гирифта, азм доранд, ки боз зиёда аз 1 ҳазору 200 тонна пахта ҷамъ оварда, ҳосилнокии ҳар гектарро ба 25-30 сентнерӣ расонанд.