Ба захирагоҳ ҷаву гандум фиристода мешавад

Душанбе, 25 октябр. (АМИТ «Ховар», Лаззат Диловарзод).- Аз Маркази миллии ҷумҳуриявии захираҳои генетикӣ ба мухбири АМИТ «Ховар» иттилоъ  доданд, ки дар натиҷаи баргузории як  экспедитсияи муштараки байналмилалӣ, ки олимони Тоҷикистон, Нидерландия ва Русия  дар вилоятҳои Хатлону Суғд ва ноҳияҳои тобеи ҷумҳурӣ баргузор намуданд, 53 намунаи тухмии исфанҷор ва харбузаи дерпазро ҷамъоварӣ ва ба фонди марказ ворид намуданд.Тадқиқоти экологии олимон дар минтақаи Файзобод дар баландии 1200 метр аз сатҳи баҳр доир ба коллексияи навъҳои ҷави селексияи Маркази илмии байналмилалӣ — ИКАРДА ва маҳаллӣ идома дорад. Олимони тоҷик тухмии   ғалла, аз қабили  1000 навъ гандум ва 624 навъу намунаҳои ҷавро барои садсолаҳо нигоҳ доштан ба захирагоҳи умумиҷаҳонии Свалборд (СИДА НордГен)-и  Шветсия  интиқол доданд.