Созишномаи Гаага тасдиқ гардид

Душанбе, 12 октябр.(АМИТ «Ховар», Марзия Саидова).- 12 октябри соли 2011 палатаи поёнии парлумони Тоҷикистон Санади Женевагии Созишномаи Гаага дар бораи бақайдгирии байналмилалии намунаҳои саноатиро баррасӣ ва тасдиқ намуд. Фаррух Ҳамралиев, вазири рушди иқтисод ва савдои ҷумҳурӣ зимни ташреҳи санади мазкур гуфт, ки сарфа намудани хароҷоти маъмурӣ, дастгирӣ намудани тиҷорат ва имтиёзҳои иқтисодию молиявӣ аз афзалиятҳоест, ки кишварҳои ба ин Созишнома ҳамроҳшуда ба даст меоранд. Шаҳрвандони давлатҳои иштирокчии санади Гаага метавонанд муҳофизати намунаҳои худро дар як қатор давлатҳо бо иҷрои расмиёт ва хароҷоти камтарин ба даст оранд. Хусусан, ба онҳо лозим нест, ки дархостҳои миллиро дар ҳар давлате, ки дар он ҳуҷҷатҳои муҳофизатӣ талаб карда мешавад, пешниҳод намоянд. Инчунин, тартиб додани ҳуҷҷатҳо бо забонҳои гуногун, назорати мӯҳлатҳои азнавбақайдгирӣ зарурат надорад. Пардохти боҷҳои миллӣ ва музди намояндагон низ дар ҳар давлат талаб карда намешавад. Истеҳсолкунандагон ва тоҷирони ҳар кадом давлатҳои аъзои Созишномаи Гаага аз тарафи худ метавонанд, ки ба Созишнома ҳамроҳ шуда, намунаҳои худро дар дигар кишварҳо самаранок ҳимоя ва ҳифз намоянд ва содироти молҳояшонро ба ин давлатҳо бештар гардонанд. Ҳамроҳшавӣ ба Созишномаи мазкур ҳеҷ гуна ӯҳдадориҳои молиявиро аз ҷониби давлатҳои аъзо талаб намекунад. Тасдиқи санади мазкур аз сӯи парлумони кишвар ба ҳамроҳшавии Тоҷикистон ба Созмони Умумиҷаҳонии Савдо мусоидат менамояд.