Заминларза дар Туркиё

Истанбул, 24 октябр. (АМИТ «Ховар», Катерина Аксакова). – 23 октябри соли ҷорӣ дар ҷанубу шарқии Туркиё, дар вилояти Вон заминларза ба амал омад, ки шиддати он аз рӯи ҷадвали Рихтер 7,2 баллро ташкил дод. Тавре ки вазири корҳои дохилии ин  кишвар Идрис Наим Шоҳин иттилоъ дод, тибқи маълумоти охирин бар асари заминларза 217 нафар ба ҳалокат расида, зиёда аз 1000 нафари дигар ҷароҳати гуногун бардоштаанд.Тибқи иттилои ВАО-и Туркиё дар натиҷаи ин офати табиӣ наздики 50 бино, аз ҷумла хонаҳои баландошёнаи истиқоматӣ ва хобгоҳҳои донишгоҳҳо валангор шуда, ба фурудгоҳ зарари зиёд расидааст. Дар вилояти Вон интиқоли нерӯи барқ қатъ гардидааст.  Охирин заминларзаи шадид дар кишвари Туркиё моҳи майи соли ҷорӣ дар ноҳияи Симови музофоти Кютахя дар 330 километрии  ҷанубу ғарбии Анқара ба қайд гирифта шуда буд. Қувваи заминларза 5,9 баллро ташкил дода, бар асари он чор нафар ҳалок ва зиёда аз 100 нафар маҷрӯҳ гардида буданд.