Ҷаласаи нахустини Шӯрои миллии муқовимат бо коррупсия

Душанбе, 30 декабр. (АМИТ «Ховар», Дилшодаи Хайруллоҳ). – Имрӯз таҳти раёсати Сарвазири Ҷумҳурии Тоҷикистон Оқил Оқилов ҷаласаи нахустини Шӯрои миллии муқовимат бо коррупсияи Ҷумҳурии Тоҷикистон баргузор гардид.Сарвазири мамлакат, Раиси Шӯрои миллии муқовимат бо коррупсияи Ҷумҳурии Тоҷикистон Оқил Оқилов дар назди аъзои Шӯро изҳор намуд, ки тақвияти мубориза бар зидди ин зуҳуроти номатлуби ҷомеа, ки ба пешрафти сиёсӣ, иқтисодӣ ва иҷтимоии мамлакат хатари азим дораду эътибори давлат ва ҳокимиятро дар назди ҷомеа коҳиш медиҳад, дар мадди назари аввали роҳбарияти сатҳи олии давлату ҳукумати Тоҷикистон қарор дорад.Оқил Оқилов таъкид кард, ки ба тавсиб расидани қонунҳои Ҷумҳурии Тоҷикистон «Дар бораи мубориза бар зидди коррупсия», «Дар бораи назорати давлатии молиявӣ дар Ҷумҳурии Тоҷикистон», Фармони Президенти Ҷумҳурии Тоҷикистон «Дар бораи тадбирҳои иловагии мубориза бар зидди ҷинояткорӣ дар соҳаи иқтисод ва коррупсия», «Стратегияи мубориза бар зиддии коррупсия дар Ҷумҳурии Тоҷикистон барои солҳои 2008-2012», «Нақшаи чорабиниҳо оид ба таъминоти иҷрои тадбирҳои иловагии тақвияти муқовимат бо коррупсия дар Ҷумҳурии Тоҷикистон барои солҳои 2010-2012» ва дигар ҳуҷҷату санадҳои давлатӣ аз ҷумлаи тадбирҳое ба ҳисоб мераванд, ки дар Ҷумҳурии Тоҷикистон ба хотири пешгирӣ ва тақвияти мубориза бар зидди коррупсия анҷом дода шудаанд.Ҳамзамон дар ҷаласа котиб ва дигар аъзои Шӯрои миллии муқовимат бо коррупсияи Ҷумҳурии Тоҷикистон сухан гуфта, аз тадбирҳои анҷомдодашуда дар роҳи мубориза бо коррупсия ва роҳу усулҳои нави муқовимат бар зидди ин падидаи номатлуби ҷомеа ёдовар шуданд.Таъкид кардан ба маврид аст, ки Шӯрои миллии муқовимат бо коррупсияи Ҷумҳурии Тоҷикистон ҳамчун мақоми умумимиллии машваратӣ, мутобиқсозандаи фаъолияти мақомоти давлатӣ ва ҷалби ҷомеаи шаҳрвандӣ барои амалигардонии чораҳои пешгирӣ ва муқовимат бо коррупсия бо Фармони Президенти Ҷумҳурии Тоҷикистон моҳи декабри соли 2010 таъсис дода шуда, сохтори он аз раис, котиб ва аъзои Шӯро иборат мебошад.Дар охир аз ҷараёни ҷаласаи нахустини Шӯро натиҷагирӣ ба амал омад ва бо назардошти пешниҳодҳои асосноки раис, котиб ва аъзои Шӯрои миллии муқовимат бо коррупсияи Ҷумҳурии Тоҷикистон нақшаи чорабинииҳои Шӯрои миллии муқовимат ба коррупсияи Ҷумҳурии Тоҷикистон ҷиҳати баланд бардоштани маърифати ҳуқуқии шаҳрвандон, ҷалби ҷомеаи шаҳрвандӣ дар самти муқовимат ба коррупсия, андешидани тадбирҳои огоҳсозӣ, пешгирӣ ва фаҳмондадиҳии оқибати номатлуби ҳолатҳои коррупсионӣ барои соли 2012 ва нақшаи чорабиниҳо оид ба таъмини иҷрои тавсияҳои Ташкилоти ҳамкории иқтисодӣ ва рушд барои Тоҷикистон тасдиқ карда шуданд.