Хадамоти муҳоҷират почтаи электронии худро кушод

Душанбе, 7 декабр. (АМИТ «Ховар», Лутфия Эшонқулова).- Хадамоти муҳоҷирати Тоҷикистон ҷиҳати ошноӣ пайдо кардан аз ҳолати кунунии муҳоҷирон дар хориҷи кишвар ва гуфтугӯ бо онҳо почтаи электронии худро таҳти унвони muhojirat_tj @mail.ru кушод. Аз маркази матбуотии ин хадамот ба хабаргузории «Ховар » иттилоъ доданд, ки мақсад аз ташкили почтаи электронӣ тақвият ва густариши ҳамкориҳо бо созмонҳои байналмилалӣ, ташкилотҳои давлатию ғайридавлатӣ ва инчунин ВАО мебошад. «Ба роҳ мондани почтаи электронӣ қадами аввалин нест дар роҳи беҳбудии вазъият ва гуфтугӯ бо муҳоҷирон ва аз наздик шинос шудан бо ҳолати будубоши муҳоҷирон, навиштани мактубҳо, инчунин огоҳӣ пайдо кардан аз фаъолияти муҳоҷират ва номояндагиҳои он дар хориҷи кишвар»,- афзуд манбаъ. Гузашта аз ин, намояндагони ин хадамот бо таъсиси почтаи электронӣ умедвори ҳамкориҳои бештар бо тамоми созмонхои чамъиятӣ ва ҷамъиятҳои муҳоҷирон ҷиҳати ҳифзи ҳуқуқу манфиатҳои муҳоҷирони меҳнатӣ мебошанд.