Таъсиси бонки фаръии «Бонки рушди Тоҷикистон»

Душанбе, 7 декабр. (АМИТ «Ховар», Покиза Маҳмадбекова). — Ҷамъияти саҳҳомии кушодаи «Тоҷиксодиротбонк» бо мақсади васеъ намудани доираи хизматрасониҳои бонкӣ барои мардуми кишвар ва мусоидат ба пешрафти низоми бонкии ҷумҳурӣ 100% саҳмияҳои ҶСП «Бонки рушди Тоҷикистон»-ро харид намуда, дар заминаи он бонки фаръии худро таъсис дод. Ба АМИТ «Ховар» аз маркази матбуоти ҶСК «Тоҷиксодиротбонк» иттилоъ доданд, ки фаъолияти бонки фаръии ҶСП «Бонки рушди Тоҷикистон» дар низоми «Тоҷиксодиротбонк», ки дар заминаи яке аз бонкҳои фаъоли мамлакат таъсис ёфт, барои афзун намудани нишондиҳандаҳои бонк ва ҳамзамон таъмини дастрасии бештари мардуми кишвар ба хизматрасониҳои муосири бонкӣ мусоидат хоҳад намуд.