Қарзҳои хурд барои рушди демократия дар Тоҷикистон

Душанбе, 4 январ. (АМИТ «Ховар», Пайрав Назаров). – Сафорати Иёлоти Муттаҳидаи Амрико қабули дархостҳоро барои қарзҳои хурди бебозгашти Комиссияи рушди демократия барои соли 2012 эълон менамояд.Тавре дар Сафорати ИМА дар Тоҷикистон ба АМИТ «Ховар» хабар доданд, мақсад аз ин барнома додани қарзҳои хурди бебозгашт ба лоиҳаҳое мебошад, ки ба рушди сохторҳои демократии Тоҷикистон мусоидат менамоянд. Қарзҳои бебозгашт аксаран ба созмонҳои ғайриҳукуматию ғайритиҷоратӣ дода мешаванд. Ҳаҷми қарзҳо набояд беш аз 50 ҳазор доллари ИМА – ро ташкил диҳад. Вале авлавият ба он лоиҳаҳое дода мешавад, ки чорабиниҳои зикршударо барои маблағи камтар дар назар доранд. Барои гирифтани ҳуқуқи баррасии дархост созмони дархостдиҳанда бояд ба фаъолияте машғул шавад, ки ба рушди сохторҳои демократии Тоҷикистон мусоидат кунад.