Имомхатибон ва давраи бозомӯзӣ

Душанбе, 9 январ. (АМИТ «Ховар», Дилшодаи Хайруллоҳ). –«Фаъолияти як масҷиди ҷомеъ бинобар вайрон намудани талаботи қонун ба мӯҳлати 3 моҳ боздошта шуд. Ҳамзамон ба панҷ иттиҳодияҳои динӣ аз шаҳрҳои Душанбе, Роғун ва ноҳияҳои Рӯдакӣ ва Ҳисор барои пешгирии қонуншиканӣ огоҳинома дода шуд»- гуфт зимни нишасти матбуотӣ ба хабарнигорони ВАО раиси Кумитаи оид ба корҳои дини назди Ҳукумати Ҷумҳурии Тоҷикистон Абдураҳим Холиқов. Мавсуф қайд намуд, ки бо мақсади баланд бардоштани савияи дониши динии имомхатибон, баланд бардоштани нақши занон дар ҳаёти ҷамъиятӣ аз таърихи 3 марти соли 2011 то 6 октябри соли 2011 дар ҳамкорӣ бо Фонди нуфуси СММ (UNFPA) ва дигар созмонҳои байналмилалӣ 11 маротиба курсҳои бозомӯзии имомхатибони масҷидҳои ҷомеи ҷумҳурӣ ташкил карда шуд, ки дар маҷмӯъ 448 нафар имомхатиб аз вилоятҳо ва шаҳру ноҳияҳои ҷумҳурӣ ба он фаро гирифта шуд. Ҳамчунин зикр шуд, ки дар курсҳои бозомӯзӣ мавзӯъҳои ҳуқуқ ва озодиҳои динӣ, донишҳои тахассусӣ ва ибтидоии динӣ, таҳаммулгароӣ, инсондӯстӣ, худшиносии миллӣ, ваҳдати миллӣ, танзими оила, нақши уламо ва ходимони дин дар пешгирии бемориҳои вогир (эпидемия), аз қабили ВИЧ/СПИД, баробарии гендерӣ, тарзи солими ҳаёт ва дигар арзишҳои ҳуқуқии Конститутсияи Ҷумҳурии Тоҷикистон ва санадҳои меъёрии ҳуқуқӣ таълим дода шуданд.