Нокомии самбочиён

Душанбе, 28 феврал. (АМИТ «Ховар», Аловиддин Бӯриев).- Ширкати паҳлавонони тоҷик дар риштаи самбо барои ҷоизаи Президенти Ҷумҳурии Беларус, ки дар шаҳри Минск ба анҷом расид, натиҷаи дилхоҳ надод. Дар ин мусобиқаи байналмилалӣ дар қатори намояндагони 20 кишвар паҳлавонон Акмалиддин Каримов (57 кг), Мустафо Ҳасанов (68 кг), Сайфиддин Раҷабов (74 кг), Абдуваҳҳоб Сатторов (82 кг) ва Бобури Насимҷон (90 кг) ҳунарнамоӣ карданд.Дар ҳисоби даставӣ тими мунтахаби Беларус бо 15 медал (6 тилло, 4 нуқра ва 5 биринҷӣ) ғолиб омад. Дастаи Русия (1 тилло, 2 нуқра ва 3 биринҷӣ) дар ҷойи дуввум ва тими Қазоқистон (1 тилло, 2 нуқра) дар ҷойи севвум қарор гирифтанд.