Пули то ҳол насохта

Кӯлоб, 4 феврал. (АМИТ «Ховар», Ф.Мадаминов). – Соли 2005 дар ноҳияи Ҳамадонӣ дар натиҷаи баланд шудани сатҳи оби дарёи Панҷ ва бориши зиёд сел омад ва аксари пулҳо ва хонаҳои истиқоматии мардумро вайрон кард. Аз ҷумла, пулҳои деҳаҳои Кодара, Сафедоб аз ҷамоати «Калинин», ҷамоати «Турдиев», деҳаи Файзобод ва пули миёни деҳаи Тагноб хароб шуданд. Сарвари давлат Эмомалӣ Раҳмон зимни боздид аз ин ноҳия расман супориш дода буд, ки ҳатман пулҳо барқарор шаванд. Вале ба ҷуз панҷарапӯш кардани баъзе мавзеъҳои фурӯрафта бо сангу семент то ҳол ягон пулро барқарор накардаанд. Ҳол он ки барои ин кор аз буҷаи давлат маблағ ҷудо шуда буд.