Шартнома кафолати ҳуқуқи шумост

Душанбе, 9 феврал. (АМИТ «Ховар», Лаззат Диловарзод).- Аз дафтари матбуоти Хадамоти муҳоҷирати назди Ҳукумати ҷумҳурӣ ба мухбири АМИТ «Ховар» иттилоъ доданд, ки аризаи яке аз шаҳрвандони Тоҷикистон аз болои ширкати «Арт Клин Сервис»-и Федератсияи Русия перомуни надодани 20 ҳазор рубли музди меҳнаташ мавриди санҷиш қарор дода шуд. Азбаски шаҳрванди Тоҷикистон бо ширкати мазкур дар асоси шартнома (қарордод) кор мекард, намояндаи Хадамоти муҳоҷирати назди Ҳукумати Ҷумҳурии Тоҷикистон дар ФР А. Урунов далели напардохтани музди меҳнати шаҳрванди Тоҷикистонро аз тарафи корхона дар асоси шартнома (қарордод) тасдиқ намуда, маблағи аз тарафи ширкат пардохтнашударо ба ӯ баргардонид. Мақсад аз овардани як мисол ҳушдор додани муҳоҷирони меҳнатӣ дар хориҷи кишвар аст, ки онҳо бо корфармо бидуни шартнома (қарордод) набояд фаъолияти худро ба роҳ монанд.