Таъсиси гурӯҳи корӣ аз ҳисоби коршиносону олимон

Душанбе, 10 феврал.(АМИТ «Ховар», Марзия Саидова).-Бо мақсади мукаммалсозии низоми мавҷудаи идораи системаи нақлиёти мусофиркашонии ҷамъиятӣ дар пойтахт гурӯҳи корӣ дар ҳайати мутахассисон ва коршиносони мустақили соҳа таъсис дода шуд. Назар ба иттилои Шавкат Саидов, котиби матбуотии Раиси шаҳри Душанбе, гурӯҳи кории мазкурро Олимҷон Бобоев, директори Пажӯҳишгоҳи иқтисодиёт ва демографияи Академияи илмҳои ҷумҳурӣ роҳбарӣ менамояд. Ба гурӯҳи корӣ супориш шудааст, ки тӯли як моҳ масъалаи низоми мавҷудаи идораи системаи нақлиёти мусофиркашонии пойтахтро мавриди пажӯҳиши амиқ қарор дода, сохтор ва роҳҳои нави беҳтар сохтани хизматрасонии нақлиёти ҷамъиятиро таҳия ва ба Раиси шаҳр манзур созанд.