Дидори сафири Куба аз ПСС ҶТ

Душанбе, 16 март. (АМИТ «Ховар», Покиза Маҳмадбекова). – Дар ҷараёни мулоқоти раиси Палатаи савдо ва саноати Тоҷикистон Шариф Саид ва сафири Куба дар ҶТ Абелардо Фабио Эрнандес Ферреро масъалаҳои ҳамкории Тоҷикистон ва Куба дар бахшҳои мухталиф мавриди муҳокима қарор гирифтанд. Тавре дар Палатаи савдо ва саноати ҷумҳурӣ ба АМИТ «Ховар» хабар доданд, сафир дар ҷараёни мулоқот даъватномаи раиси Палатаи савдо ва саноати Кубаро дар мавриди иштирок дар Ярмаркаи байналмилалии Гавана, ки аз 4 то 10 ноябри соли 2012 баргузор мегардад, ба Шариф Саид супурд.Сипас сафири Куба аз самтҳои содиротии Куба нақл карда, хоҳиш намуд, ки дар бораи имконияти содиротии Тоҷикистон ба ӯ маълумот дода шавад. Дар хотима Шариф Саид аз самтҳои афзалиятноки иқтисодиёти ҷумҳурӣ, ҳамчунин гидроэнергетика, канданиҳои фоиданок, сохтмон, фарҳанг, маориф ва туризм нақл намуд.