Ҷоми чемпионҳои Аврупо: «Бавария»-«Реал»

Душанбе, 17 апрел. ( АМИТ «Ховар», Аловиддин Бӯриев).- Имрӯз дар варзишгоҳи «Алянс Арена»-и Олмон бозии нимниҳоии Ҷоми чемпионҳои Аврупо бо ширкати «Бавария» ва «Реал» барпо мегардад. Ин дастаҳои пурқуввати Аврупо дар якҷоягӣ 13 маротиба Ҷоми чемпионҳоро ба даст овардаанд. Клуби «Реал» 9 маротиба (1956-1960, 1966, 1998, 2000 ва 2002), ва «Бавария» 4 маротиба (1974-1976 ва 2001) ба ин комёбӣ мушарраф шудаанд. Ин дастаҳо байни ҳам 18 маротиба вохӯрдаанд, ки дар он 10 маротиба «Бавария» ва 6 маротиба «Реал» шаҳди ғалаба чашидаанд. Ин навбат агар «Бавария» ғолиб ояд он вақт дар финали ҷом, ки маҳз дар варзишгоҳи «Алянс Арена» баргузор мешавад, дар ҳузури мухлисонаш бозӣ хоҳад кард.