Баррасии масоили муҳоҷират дар Зафаробод

Душанбе, 17 апрел. (АМИТ «Ховар», Лутфия Эшонқулова).- 16 апрели соли равон дар маркази ноҳияи Зафаробод семинар-тренинг дар мавзӯи «Идораи муҳоҷират» оғоз гардид. Он дар толори маркази «Баҳор»-и ноҳия бо ҷалби намояндагони шӯъбаҳои кор бо занон ва оила, САҲШ, шуғли аҳолӣ ва муҳоҷират, хадамоти гумрук, шӯъбаи шиносномадиҳӣ, ҷавонон ва маорифи мақомоти иҷроияи ноҳия, намояндагони ҷамоатҳою шаҳраку деҳот, раисони маҳаллаҳо ва фаъолони ноҳия доир ба масъалаи муҳим барои шаҳрвандони мамолики пасошӯравӣ ҷараён гирифт. Мушовири миллии Созмони байналмилалии муҳоҷират Моёншо Маҳмадбеков доир ба мавзӯи «Эҷоди тавонмандӣ ва иттилоот барои муҳоҷирони потенсиалӣ ва оилаҳои онҳо дар хусуси муҳоҷирати меҳнатӣ ва интиқоли маблағҳо» сухан карда, ҳамзамон дар бобати ба мушкилот мувоҷеҳ нагардидани муҳоҷирати меҳнатӣ тавсияҳо дод. Семинар бо дастгирии «Барномаи рушди деҳот» созмон дода шуд ва давоми чор рӯз ҷанбаҳои гуногуни муҳоҷирати меҳнатиро мавриди баррасӣ қарор медиҳад.Дар ин бора ба АМИТ «Ховар» аз Хадамати матбуоти раиси вилояти Суғд хабар доданд.