Гардиши тиҷорати хориҷии Тоҷикистон афзуд

Душанбе, 17 апрел. (АМИТ «Ховар», Покиза Маҳмадбекова). – Тайи семоҳаи аввали соли 2012 гардиши тиҷорати хориҷии Тоҷикистон беш аз 1 миллиарду 245 миллиону 500 ҳазор доллари ИМА – ро ташкил дод, ки нисбат ба нишондоди ҳамин давраи соли гузашта 7,8 фоиз зиёд аст. Мувофиқи маълумоти Агентии омори назди Президенти ҶТ, баланси тиҷоратӣ манфӣ буда ва беш аз 589 миллиону 200 ҳазор доллари ИМА – ро ташкил медиҳад. Тоҷикистон тайи давраи гузашта бо 79 кишвари ҷаҳон, аз ҷумла бо 10 мамлакати аъзои ИДМ ва 69 мамлакати хориҷи дур муносибатҳои тиҷорати хориҷӣ дошт. Дар хабар ҳамчунин зикр мешавад, ки камбуди баланси тиҷоратӣ бо кишварҳои ИДМ баробари 461 миллиону 500 ҳазор доллар ва бо кишварҳои хориҷи дур баробари 127 миллиону 700 ҳазор доллари ИМА буд. Дар ҳамин давра содироти мол беш аз 328 миллиону 200 ҳазор доллар ва воридоти он зиёда аз 917 миллиону 400 ҳазор доллари ИМА – ро ташкил дод. Шарикони асосии ҶТ дар гардиши тиҷорати хориҷӣ аз ҷумлаи кишварҳои ИДМ Русия, Қазоқистон, Туркманистон ва аз ҷумлаи мамлакатҳои хориҷи дур Туркия ва Чин мебошанд.