Муаррифии китоб дар бораи Наврӯз

Душанбе, 17 апрел. (АМИТ «Ховар», Людмила Дубинина). – Дар китобхонаи миллии Тоҷикистон ба номи Абулқосим Фирдавсӣ муаррифии китобҳои «Китобномаи Наврӯз», «Сабкшиносӣ» — и Маликушшуаро Баҳор, «Таърихи Бухоро» — Абӯбакри Наршахӣ, ҳамчунин китобҳои интишорнамудаи олимони Китобхонаи миллии Тоҷикистон баргузор гардид. Мураттибони ин китобҳо олимони Институти таърих, бостоншиносӣ ва этнографияи ба номи Аҳмади Дониши Академияи илмҳои ҶТ, Китобхонаи миллии Тоҷикистон ва Маркази илмии байналмилалии фарҳанги мусиқии халқҳои Шарқ ба номи Борбад мебошанд. Баъди маросими муаррифии китобҳо конфронси илмии ҷумҳуриявӣ дар мавзӯи «100 – солагии нахустин рӯзномаи тоҷикии «Бухорои Шариф» баргузор гардид. Қобили зикр аст, ки ҳоло дар китобхонаи миллӣ аз ҷумлаи 153 нусхаи рӯзнома 119 нусхааш боқӣ мондааст.- Рӯзномаи «Бухорои Шариф» ҳамагӣ қариб 10 моҳ амри вуҷуд дошта бошад ҳам, вале ба барқароршавии журналистикаи тоҷик, ки баъдан онро рӯзномаю маҷаллаҳои сершумори кишварамон рушду густариш бахшиданд, таъсири зиёде расонид, — гуфт директори Китобхонаи миллии Тоҷикистон Н.Салимов.