Шартнома барои 3,5 млн. дона бонка

Душанбе, 16 апрел. (АМИТ «Ховар», Дилшодаи Хайруллоҳ).- Корхонаи шишабарории шаҳри Қайроққум ба Ҷумҳурии Тоҷикистон хатти технологии истеҳсоли шиша ва зарфҳои шишагиро ворид намуд. Дар айни замон хатти технологии истеҳсоли бонкаҳои 1 ва 2 литра пурра насб шуда, то имрўз 10 ҳазор дона бонка ба таври озмоишӣ истеҳсол шудааст. Барои зиёд кардани ҳаҷми истеҳсоли бонка аз Ҷумҳурии Мардумии Чин як хумдони дигар харидорӣ шудааст, ки рўзҳои наздик он дар корхона насб карда мешавад. Тибқи нақшаи роҳбарияти корхона ифтитоҳи расмии коргоҳ охири моҳи ҷорӣ пешбинӣ шудааст. Дар коргоҳ боз 60 ҷойи корӣ ташкил мешавад. Мавриди зикр аст, ки корхона аллакай бо соҳибкорони ватанӣ барои истеҳсоли 3,5 миллион дона бонка шартнома бастааст, ки баъзеашон қисми маблағи онро пешпардохт кардаанд.