Эмомалӣ Раҳмон: «Мутахассисони ватаниро бештар ба кор ҷалб кунед!»

Душанбе, 4 август. (АМИТ «Ховар», Дилшодаи Хайруллоҳ)- Президенти Ҷумҳурии Тоҷикистон Эмомалӣ Раҳмон дар доираи сафари кории худ дар ноҳияи Ёвон аз корхонаи муштараки Ху Ак Син Ғайюр семент, ки иқтидори истеҳсолии 1 млн тонна сементро доро мебошад, дидан намуд. Корхонаи мазкур бо сармояи 100 миллион доллари амрикоӣ сохта шуда истодааст. Гуфта шуд, баъди баистифодадиҳии ин корхона 1100 нафар шаҳрвандон соҳиби ҷои кори доимӣ мегарданд. Айни замон корҳои сохтмонӣ дар иншооти мазкур аз рӯи нақша идома ёфта истодааст. Аз аввали соли ҷорӣ то ин чониб дар ин иншоот корҳои омода гардонидани майдончаҳои зери сохтмон, кандани замин ба андозаи 100% иҷро гардидианд. Аз аввали моҳи июн сар карда, ба ширкат ҳамарӯза дастгоҳу таҷҳизотҳо ворид гардида истодаанд. Корҳои бетонрезии таҳкурсиҳо аз даҳрӯзаи дуюми моҳи июл оғоз гардидааст. Айни замон шумораи коргарон дар корхонаи мазкур зиёда аз 400 нафар буда, аз ин шумора 110 нафар мутахассисони чиноӣ ва боқимонда коргарони ватанӣ мебошанд. Корҳои сотмонӣ дар иншоот босубот идома доранд. Сарвари Давлат ба масъулин дастур дод, ки тамоми кӯшишҳоро ҷиҳати ҳарчи бештар ба кор ҷалб намудани мутахассисони ватанӣ ба харҷ диҳанд.