Барқияи табрикотии Эмомалӣ Раҳмон ба Маҳмуди Аҳмадинажод

Душанбе, 11 феврал (АМИТ «Ховар»).- Президенти Ҷумҳурии Тоҷикистон Эмомалӣ Раҳмон ба Раиси Ҷумҳурии Исломии Эрон Маҳмуди Аҳмадинажод барқияи табрикотӣ ирсол намуд, ки дар он аз ҷумла омадааст:«Ҷаноби Олӣ,Фарорасии ҷашни умумимиллии кишвари бародарро ба Шумо ва тамоми мардуми бародари Эрон самимона табрику таҳният мегӯям.Мо ба дурнамои неки муносибатҳои ду кишвари ҳамкешу ҳамфарҳанг эътимоди қавӣ дорем, зеро ба шарофати густариш ва таҳкими онҳо дар арсаҳои бунёдӣ, қабл аз ҳама дар бахшҳои тиҷорату сармоягузорӣ, тӯли солҳои охир равобити байнидавлатии ду кишвар на фақат дар асоси дуҷониба, балки дар сатҳи бисёрҷониба низ пайгирона густариш ёфта, мазмуни сифатан нав касб намудааст.Итминони комил дорам, ки муносибатҳои минбаъдаи мо дар асоси боэътимоди қарордодиву ҳуқуқии мавҷуда рушду тавсеа ёфта, боиси афзоиши назарраси ҳаҷми гардиши тиҷоратии байни ду кишвар ва сармоягузориҳои мустақими эронӣ ба иншооти стратегии иқтисоди Тоҷикистон мегарданд.Дар ин айёми фархунда – бо ибрози табрикоти муҷаддад – ба Ҷаноби Олӣ сиҳатии комил ва комёбиҳои рӯзафзун ва ба мардуми шарифи Эрон амонӣ, саодат ва шукуфоӣ таманно дорам».
Маводи муфассал доир ба ин ва дигар мавзуъҳои фаъолияти Сарвари давлат Эмомалӣ Раҳмон, аз ҷумла матн, акс ва навори видеоиро метавонед аз сомонаи расмии Президенти Ҷумҳурии Тоҷикистон «president.tj» дастрас намоед.