Эрон барои «Истиқлол» 3 млн. $ ҷудо мекунад

Душанбе, 10 апрел.(АМИТ «Ховар», Марзия Саидова).-Эрон барои иҷрои корҳои боқимондаи сохтмонӣ дар нақби «Истиқлол», воқеъ дар шимоли Тоҷикистон 3 миллион $ ҷудо менамояд. Дар робита ба ин 10 апрел вакилони палатаи поёнии Парлумони Тоҷикистон Ёддошти тафоҳуми иловагӣ байни Ҳукумати Ҷумҳурии Тоҷикистон ва Ҳукумати Ҷумҳурии Исломии Эрон оид ба иҷрои бозсозии нақби «Истиқлол» дар Ҷумҳурии Тоҷикистон ва Ёддошти тафоҳуми иҷроӣ байни Ҷумҳурии Тоҷикистон ва Ҷумҳурии Исломии Эрон барои сохтмони нақби «Анзоб»-ро тасдиқ намуданд. Низом Ҳакимов- вазири нақлиёти ҷумҳурӣ зимни тавзеҳи санадҳои мазкур гуфт, ки мақсад аз тасдиқи ду Ёддошти тафоҳум анҷоми татбиқи лоиҳа мебошад. Дар асоси банди 3-и Ёддошти тафоҳуми иловагӣ, Тоҷикистон 3 млн. $ ва Эрон низ ҳамчун кӯмаки бебозгашт 3 миллион $ ҷиҳати иҷрои корҳои боқимондаи лоиҳа ҷудо менамоянд. Дар маҷмуъ маблағи умумии лоиҳа, ки 6 миллион $ муайян шудааст, дар ҳисоби муштараке. ки Вазорати нақлиёти Тоҷикистон ва Сафорати Ҷумҳурии Исломии Эрон дар Тоҷикистон таъсис дода шудааст , нигоҳ дошта мешавад.