Рақибони тими мунтахаби кишвар дар Ҷоми ҷаҳон-2018 муайян шуданд

Душанбе, 15.04.2015. (АМИТ “Ховар”, Фарзонаи Давлат).-Дирӯз дар асоси қуръакашии даври дуюми интихобии қаҳрамонии ҷаҳон оид ба футбол-2018, ки дар пойтахти Малайзия- шаҳри Куала-Лумпур баргузор шуд, тими мунтахаби Тоҷикистон дар гурӯҳи “В” бо тимҳои миллии Австралия, Урдун, Қирғизистон ва Бангладеш рақобат мекунад.
Тавре ки дар ин бора сомонаи Федератсияи футболи Тоҷикистон хабар медиҳад, марҳилаи дуюми интихобӣ барои мунтахаби Тоҷикистон 11 июни соли равон дар Душанбе дар дидор ба муқобили мунтахаби Урдун шурӯъ мешавад.
Гуфта мешавад, натиҷаи қуръакашии даври дуюми интихобии қаҳрамонии ҷаҳон оид ба футбол-2018, ки беш аз 40 дастаҳои миллии кишварҳои Осиё иштирок доранд, дастаҳои миллии  ИМА, Арабистони Саудӣ, Фаластин, Тимори Шарқӣ, Малайзия дар гурӯҳи «А», дар гурӯҳи «В» Австралия, Урдун, Тоҷикистон, Қирғизистон, Бангладеш, дар гурӯҳи «C» Чин, Қатар, Молдив, Бутан, Ҳонконг, дар гурӯҳи «D»Эрон, Умон, Ҳиндустон, Туркманистон, Гуам, дар гурӯҳи «E» Ҷопон, Сурия, Афғонистон, Сингапур, Камбоҷа, гурӯҳи «F»: Ироқ, Ветнам, Тайланд, Индонезия, Тайван, дар гурӯҳи «G»: Кореяи Ҷанубӣ, Кувайт, Лубнон, Мянмар, Лаос, ва дар гурӯҳи «H»: Ӯзбекистон, Баҳрайн, Филиппин, Кореяи Шимолӣ, Яман шомил гаштаанд.