Вуруди маҳсулоти нафтӣ ба ҷумҳурӣ кам шудааст

Душанбе, 14.07.2015 (АМИТ «Ховар», Фарзонаи Давлат).- Дар нимсолаи аввали соли 2015 ба ҷумҳурӣ 282,8 ҳазор тонна маҳсулоти нафтӣ ворид шудааст, ки нисбат ба ҳамин давраи соли гузашта 40,63 ҳазор тонна кам мебошад. 
Тавре ки Абдуфатоҳ Ғоиб, раиси Хадамоти гумруки назди Ҳукумати Ҷумҳурии Тоҷикистон  имрӯз, 14-уми июл дар ҷамъбасти нимсолаи аввали соли равон гуфт, дар шаш моҳи соли 2015 ба ҷумҳурӣ 282,8 ҳазор тонна маҳсулоти нафтӣ ворид шудааст, ки танҳо аз ҳамин ҳисоб ба буҷаи ҷумҳурӣ тақрибан 80 млн. сомонӣ ҳамчун пардохти гумрукӣ ворид нагардид.
Ҳамчунин ӯ афзуд, дар нимсолаи аввали соли ҷорӣ нисбат ба ҳамин давраи соли гузашта воридоти орд ба миқдори 16,8 ҳазор тонна,  нуриҳои минералӣ ба миқдори 3,1 ҳазор тонна ё ба маблағи 3,2 млн доллар, чўбу тахта ба миқдори 101 ҳазор м3, семент ба миқдори 227,8 ҳазор тонна ё ба маблағи 6 млн доллар, воситаҳои нақлиёти сабукрав ба миқдори 15,1 ҳазор адад коҳиш ёфтааст, ки аз ин ҳисоб тақрибан 220-225 млн.сомонӣ пардохти гумрукӣ ба буҷети мамлакат ворид нагардид.