Баррасии масоили пайвандсозии узв ва бофтаҳои инсон дар мулоқоти сафири тоҷик бо вазири Эрон

   Душанбе, 27.08.2015. (АМИТ «Ховар»).-Чанде қабл сафири Ҷумҳурии Тоҷикистон дар Ҷумҳурии Исломии Эрон Неъматулло Эмомзода ҳамроҳ бо муовини вазири тандурустӣ, ҳифзи иҷтимоӣ ва аҳолии Ҷумҳурии Тоҷикистон Насим Олимов бо доктор Саид Ҳасани Ҳошимӣ-вазири беҳдошт, дармон ва улуми пизишкии Ҷумҳурии Исломии Эрон мулоқот карданд.
Дар рафти мулоқот оид ба масъалаҳои мубрами ҳолат ва дурнамои ҳамкории Тоҷикистону Эрон, рафти татбиқи барномаву лоиҳаҳо дар соҳаи тандурустӣ, аз ҷумла дар бахшҳои дарёфт ва роҳандозии усулҳои муосири ташхис, таъминот бо маводи дорувории хушсифат, ҳамчунин дар робита ба масъалаҳои тибби муосир-пайвандсозии узв ва бофтаҳои инсон, инчунин қабули донишҷӯён тариқи бурсия ва дигар мавзӯъҳо табодули назар сурат гирифт.