Варзишгарони тоҷик аз Ӯзбекистон бо 12 медал баргаштанд

Душанбе,17.05.2016/АМИТ «Ховар»/. Варзишгарони ҷавони тоҷик дар мусобиқаи XII байналмилалии Ҷоми бози Осиё оид ба дзюдо байни навҷавонону наврасон ба хотираи устоди варзиш Учқун Муродов, ки рӯзҳои 12-15 май дар шаҳри Чирчиқи Ӯзбекистон баргузор шуд, 12 медал (3 тилло, 4 нуқра ва 5 биринҷӣ) гирифтанд. Дар ин мусобиқа наздики 200 варзишгар аз панҷ кишвар — Қазоқистон, Қирғизистон, Русия, Тоҷикистон ва Узбекистон ширкат варзида, дар 8 вазн ҳам байни писарон ва ҳам миёни духтарон қувваозмоӣ карданд. Ширкаткунандагони ин мусобиқаи анъанавӣ инчунин имсол барои имтиёзҳои олимпӣ ҷиҳати дарёфти роҳхатҳо ба Олимпиадаи наврасони соли 2018 мубориза бурданд.
Дар сабқати навҷавонону духтарон гӯштингирони тоҷик 3 медали нуқра ва се медали биринҷӣ ба даст оварданд. Паҳлавонони тоҷик Ҳоҷимашраб Раҳмонов дар вазни то 90 кило, Темур Раҳимов дар вазни то 100 кило ва Хуршед Маҷидов дар вазни беш аз 100 кило бо медалҳои нуқра сарфароз гаштанд.
Ду намояндаи дигари Тоҷикистон -Раҳматуллобек Фарҳодов (-73 кг) ва Ёқубҷон Назиров (-81 кг) бо медалҳои биринҷӣ мукофотонида шуданд. Инчунин дар сабқати духтарон Шабнам Раҳимова дар вазни то 48 кг медали биринҷӣ гирифт. Дар ҳисоби умумидаставӣ дар сабқати навҷавонон дастаи мунтахаби Узбекистон бо касби 13 медали тилло, 11 нуқра ва 16 биринҷӣ ғолиб шуд.
Тими мунтахаби Русия бо 1 медали тилло, 1 медали нуқра, 1 медали биринҷӣ дуюм ва дастаи мунтахаби Қазоқистон бо 1 медали тилло сеюм шуданд. Дастаи мунтахаби Тоҷикистон бо 3 медали нуқра, 3 медали биринҷӣ дар ҷойи чорум қарор гирифт.
Дар сабқати наврасон варзишгарони тоҷик соҳиби се медали тилло, як нуқра ва ду биринҷӣ гардиданд. Медалҳои тиллоро ба Тоҷикистон Ҷаҳонгири Шамолӣ дар вазни то 73 кило, Ҷаҳонгир Маҷидов дар вазни то 81 кило ва Шоҳида Қаландарова дар сабқати духтарон дар вазни то 57 кило оварданд.
Дар сабқати наврасон низ дастаи мунтахаби Узбекистон бо 12 медали тилло, 10 медали нуқра, 15 медали биринҷӣ мақоми аввалро касб кард. Тими мунтахаби Тоҷикистон бо 3 медали тилло, 1 медали нуқра, 2 медали биринҷӣ дуюм, дастаи мунтахаби Қазоқистон бо 2 медали нуқра, 1 медали биринҷӣ сеюм, дастаи мунтахаби Русия бо касби 1 медали нуқра, 1 медали биринҷӣ чорум ва тими мунтахаби Қирғизистон бо як медали нуқра соҳиби ҷои панҷум шуданд.