Ҳамоиши хонандагон оид ба омӯзиши асарҳо

Душанбе, 17.05.2016 /АМИТ «Ховар»/. Дирӯз дар Муассисаи таҳсилоти миёнаи умумии №50-и шаҳри Кӯлоб таҳти унвони «Китоби «Шоҳнома»-и Абулқосим Фирдавсӣ ва китоби «Тоҷикон дар оинаи таърих»-и Асосгузори сулҳу Ваҳдати миллӣ -Пешвои миллат, Президенти Ҷумҳурии Тоҷикистон муҳтарам Эмомалӣ Раҳмонро мехонем!» ҳамоиш доир гардид.
Хонандагон намоиши достони «Рустам ва Суҳроб», қироати порчаҳои шеъриро аз «Шоҳнома»-и Абулқосим Фирдавсӣ, дар васфи Ватан, Истиқлолият, Ваҳдати миллӣ, намоиши рақс ва либосҳои миллӣ, инчунин баромадҳо аз китоби «Тоҷикон дар оинаи таърих»-и Асосгузори сулҳу Ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмонро пешкаши ҳозирин гардониданд.
Ҳамоиши мазкур бо мақсади ба таври васеъ тарғиб ва муаррифии рушди соҳаҳои афзалиятноки давлатӣ, дастгириву тарбияи ҷавонон дар рӯҳияи ватандӯстӣ, бо мазмуну муҳтавои ин асарҳо шинос намудани ҷавонон ва равона сохтани онҳо ба омӯзиши ин ду шоҳасар барпо шуд.