«Андалеб»-эҳёгари суннатҳои миллӣ

Кӯлоб, 17.05.2016 /АМИТ «Ховар»/. Дирӯз дар Қасри фарҳанги шаҳри Кӯлоб бахшида ба 25-солагии Истиқлолияти давлатии Ҷумҳурии Тоҷикистон бо иштироки беш аз 500 нафар ҷавон Фестивал-озмуни ҷумҳуриявии телевизионии эҷодиёти халқ «Андалеб — 2016» баргузор шуд.
Дар даромадгоҳи Қасри фарҳанги шаҳри Кӯлоб намоиши ҳунарҳои мардумӣ, аз ҷумла чакандӯзӣ, бофандагӣ, кулолгарӣ, заргарӣ ва намоиши асбобҳои халқӣ ба тамошо гузошта шуданд.
Пас аз намоиши ҳунарҳои мардумӣ мутобиқ ба шартҳои Фестивал-озмун аз ҷониби ҳунармандон навохтани сурудҳои халқӣ, сурудҳо дар васфи Ватан, Модар, суруди алла, намоиши либосҳои миллӣ, намоиши саҳначаҳои ҳаҷвӣ ва дар дигар бахшҳо манзури аҳли толор гардиданд.
Дар саросари ҷумҳурӣ бахшида ба 25-солагии Истиқлолияти давлатии Ҷумҳурии Тоҷикистон Фестивал-озмуни «Андалеб — 2016» дар сатҳи баланд ҷараён дорад.