Ҳар як сокини пойтахт дар шукуфоии диёр бояд саҳмгузор бошад!

Душанбе, 18.05.2016 /АМИТ «Ховар/. Ҳафтаи сипаригардида дар  Муассисаи таҳсилоти миёнаи умумии № 30 бо мақсади иҷрои дастуру супоришҳои Президенти Ҷумҳурии Тоҷикистон оид ба корҳои ободонӣ ва хуррам гардонидани шоҳроҳу хиёбонҳо вохӯрии муовини якуми раиси Кумитаи ҷавонон, варзиш ва сайёҳӣ Мавсума Муинӣ бо сокинони Кооперативи моликони манзили №3-и ноҳияи Шоҳмансур баргузор гардид.
Дар вохӯрӣ зиёда аз 100 нафар сокинони маҳаллаҳои Шоҳмансур 1 ва Шоҳмансур 2 иштирок намуданд.
Мавсума Муинӣ оид ба дастовардҳои 25 соли Истиқлолияти давлатии Ҷумҳурии Тоҷикистон иброз дошт, ки мо сокинон барои муҳофизати ин дастовардҳо ва  ноил гардидан ба дастовардҳои нав ба нав дар ҳамбастагӣ бояд фаъолият намоем.
Инчунин зикр шуд, ки ҳар як сокини пойтахт чун фарди худшиносу худогоҳ дар шукуфоии диёрамон ва муаррифии Тоҷикистони соҳибистиқлол дар арсаи байналмилалӣ бояд саҳмгузор бошад.