Дар Муъминобод аз хуруҷи малахи марокашӣ пешгирӣ намуданд

Душанбе,17.05.2016 /АМИТ «Ховар»/. Мақомоти иҷроияи ҳокимияти давлатии ноҳияи Муъминобод аз рух додани ҳодисаи хуруҷи малахи марокашӣ дар атрофи деҳаи Момандиёни деҳоти ба номи Нуралишоҳ Назаров, ки масоҳати 15 километри мураббаъро дар бар мегирифт, сари вақт воқиф гардида, барои бартараф кардани он ситоди махсус ташкил намуд.
Бо мақсади зудтар бартараф кардани ҳолати бамиёномада, аз ҳисоби сокинони деҳаҳои атроф 200 нафар ҷавонмардону мутахассисони корозмудаи соҳаи кишоварзӣ сафарбар гардиданд. Онҳо тавассути 6 трактори дорупош ва бо истифода аз заҳрхимикатҳои наву босифат ба рафъ намудани хатар муташаккилона оғоз намуданд. Ташкили хуби кор самараи нек овард ва дар натиҷаи муборизаи дастаҷамъона офати малахи марокашӣ дар мудати кӯтоҳ бартараф гардида, боғоту полезҳои ноҳия аз ин хатар эмин монданд.