Дар Суғд интихоботи миёнадаврӣ гузаронида мешавад

Душанбе, 17.05.2016/АМИТ «Ховар»/. 17 июли соли равон дар ҳавзаи интихоботии вилояти Суғд №2 интихоботи миёнадаврии узви Маҷлиси миллии Маҷлиси Олии Ҷумҳурии Тоҷикистон ба ҷои узви хориҷшуда баргузор мегардад. Дар ин росто 17 май дар ҷаласаи навбатии Комиссияи марказии интихобот ва раъйпурсии ҷумҳурӣ қарори марбута қабул гардид.
Тибқи ин қарор ҳайати комиссияи ҳавзавии интихобот иборат аз 11 нафар, инчунин нақшаи тақвимии чорабиниҳои асосӣ доир ба тайёрӣ ва гузаронидани интихоботи миёнадаврии узви палатаи болоии Парлумони кишвар ба ивази узви хориҷшуда дар ҳавзаи интихоботии вилояти Суғд №2 тасдиқ карда шуданд.
Бояд тазаккур дод, ки қаблан дар курсии палатаи болоии Парлумони кишвар -Маҷлиси миллӣ аз ҳавзаи мазкур собиқ раиси шаҳри Хуҷанд Раҷаббой Аҳмадзода менишаст. Мавсуф бо Фармони Президенти кишвар раиси Кумитаи давлатии идораи замин ва геодезии Ҷумҳурии Тоҷикистон таъйин гардид.