Маълумоти пешакии Кумитаи ҳолатҳои фавқулода оид ба талафоти ҷонӣ ва хисороти расида аз офатҳои табиӣ

Май 14, 2016 13:22

Душанбе, 14.05.2016 /АМИТ «Ховар»/. Имрӯз дар бинои Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон вобаста ба офатҳои табиие, ки рӯзҳои охир дар як қатор ноҳияҳои мамлакат ба амал омаданд, барои хабарнигорони ватанӣ ва хориҷӣ бо иштироки роҳбарияти кумитаи мазкур нишасти матбуотӣ баргузор гардид.

Муовини раиси Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон Муҳаммадҷон Салимзода чунин иттилоъ дод: «Рӯзи 9 майи соли равон дар шаҳри Панҷакент соати 17-у 10 дақиқа бар асари омадани борони пуршиддат аз сойи Зебон сел омад, ки аз ҳама беш ба ҷамоати Халифа Ҳасан, деҳаҳои Шӯрча, Савр, Қӯштеппа, Шкат, Дашти Қозӣ, Кишттӯдак, Амондара, маҳаллаҳои Сойи мисрак, Зардолузор, майдонҳои кишт ва як қатор муассисаҳои шаҳри Панҷакент хисорот расонида шуд. Мутаассифона, дар натиҷаи офати табиии рӯйдода, сокини деҳаи Шӯрчаи ҷамоати деҳоти Халифа Ҳасани ноҳияи Панҷакент Тошбой Хӯҷамқулов, соли таваллудаш 1960, дар селобаи сойи Зебон ғарқ гардид. Ҷасади Хӯҷамқулов аз тарафи сокинони деҳа рӯзи 10 май дарёфт шуд. Ҳамчунин 10 майи соли равон ду нафар сокинони ноҳияи Айнӣ низ дар натиҷаи омадани сел ба ҳалокат расиданд».

Тибқи ҳисоботи пешакии комиссияи ҳолатҳои фавқулода дар натиҷаи офати табиии рӯзи 9-уми май ба 147 хонаҳои истиқоматии шаҳри Панҷакент селоба даромада, заминҳои наздиҳавлигӣ ва иншооти ёрирасони сокинон хароб гардиданд. Мувофиқи санадҳои тартибдодашуда аз 20 хонаи истиқоматӣ 14 хона пурра ва 6 хона қисман вайрон шудаанд. Офати табиӣ ба иншооти муҳими хоҷагии халқи Панҷакент зарари ҷиддӣ расонидааст, аз ҷумла 27 км роҳи мошингард, 3 пул, 6 км хатти интиқоли неруи барқ, 7 адад трансформатор, 2 км хатҳои алоқа, 63 км каналҳои магистралӣ, 4 км селпарто, 1 истгоҳи насосӣ ва иншооти гидротехникӣ, 400 метр хатти оби нӯшокӣ ғайриистифода гардиданд. Дар маҷмӯъ 603 га майдони кишт, боғу токзор, 76 га замини наздиҳавлигӣ, 146 сар чорво, аз ҷумла 21 сар чорвои калон ва 127 сар чорвои майда нобуд гардиданд. Дар ноҳияи Айнӣ бар асари омадани сел 40 сар чорвои калону хурд талаф ёфтанд.

Муовини раиси Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон Муҳаммадҷон Салимзода изҳор намуд, ки рӯзҳои 9-10 майи соли равон бар асари шамол ва боришоти борон болопӯши бомҳои хонаҳои истиқоматӣ, биноҳои маъмурӣ ва хизматрасонии иншооти соҳаи тандурустӣ, маориф ва ташкилоту муассисаҳои шаҳрҳои Хуҷанд, Конибодом, Исфара, Гулистон, Бӯстон, ноҳияҳои Бобоҷон Ғафуров, Зафаробод, Деваштич, Спитамен, Ҷаббор Расулов ва Шаҳристони вилояти Суғд зарари ҷиддӣ диданд.

Баробари сар задани офати табиӣ ситоди доимоамалкунанда ва роҳбарияти Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон ба ҷойи ҳодиса гурӯҳҳои наҷотдиҳӣ ва бартарафнамоии офати табииро сафарбар намуда, рӯзи 11 май аз тарафи кумита ба зарардидагони шаҳри Панҷакент даҳ номгӯй маводи зарурӣ, мисли хайма, кӯрпаву болишт, фонус, зарфи обгирӣ ва дигар ҷиҳози рӯзгор ба 41 оила расонида шуданд.

Май 14, 2016 13:22

Хабарҳои дигари ин бахш

Ташкилоти молиявию қарзии Хатлон ба иқтисодиёт беш аз 2 миллиард сомонӣ қарзҳои бонкӣ ҷудо намудаанд
Ба Тоҷикистон ба маблағи зиёда аз 443 миллион доллар маҳсулоти нафтӣ ворид карда шудааст
Имрӯз дар Тоҷикистон ҳаво камабри бебориш мешавад
Имрӯз дар вазоратҳои рушди иқтисод ва савдо, саноат ва технологияҳои нав, Кумитаи давлатии сармоягузорӣ ва идораи амволи давлатӣ ва Агентии омор нишасти матбуотӣ баргузор мегардад
ОБОДОНӢ ДАР ДЕҲОТ. Дар деҳаи Роҷи Панҷакент варзишгоҳи мактабӣ ба истифода дода шуд
3010 нафар сайёҳони хориҷӣ манзараҳои нотакрори Ховалингро тамошо намуданд
Дар Хатлон 165 бинои нави муассисаҳои таълимӣ бунёд карда мешавад
6 август дар вазоратҳои рушди иқтисод ва савдо, саноат ва технологияҳои нав, Кумитаи давлатии сармоягузорӣ ва идораи амволи давлатӣ ва Агентии омор нишасти матбуотӣ баргузор мегардад
Имрӯз дар Тоҷикистон гармии ҳаво ба 37 дараҷа мерасад
ТАҚВИМИ АМИТ «ХОВАР»: имрӯз 5 август, сешанбе, 217-умин рӯзи соли 2025 аст
Имрӯз дар Суди Олии иқтисодӣ, Хадамоти иҷро, Маркази тадқиқоти стратегӣ, «Амонатбонк» ва Маркази миллии тестӣ нишасти матбуотӣ баргузор мегардад
Кормандони Кумитаи ҳолатҳои фавқулода ва мудофиаи гражданӣ 20 нафарро аз ғарқшавӣ наҷот доданд