Мулоқоти муфид доир ба раъйпурсӣ дар қисми низомӣ

Хуҷанд, 18.05.2016. /АМИТ Ховар/. 17 май дар яке аз қисмҳои низомии вилояти Суғд мулоқоти муфид оид ба баргузории раъйпурсӣ ва маҳфуми он доир гардид. Чорабинӣ аз ҷониби шуъбаи кор бо занон ва оилаи мақомоти иҷроияи ҳокимияти давлати вилоят бо ҳамдастии роҳбарияти қисми низомии 2939-и шаҳри Хуҷанд доир гардид.
Тавре ки ба АМИТ Ховар сармутахассиси шуъбаи мазкур Роҳатхон Усмонова иттилоъ дод, дар вохӯрӣ  намояндаи шуъбаи кор бо занон ва оилаи мақомоти вилоят Р.Умарзода, раиси комиссияи участкаи интихоботии №64  А.Розиқов, роҳбарони қисми низомии номбурда ва беш аз 50 нафар сарбозони қисми низомӣ иштирок намуданд.
Дар ҷараёни вохӯрӣ ба иштирокдорон  оид ба зарурати ворид намудани тағйиру иловаҳо ба Конститутсияи Ҷумҳурии Тоҷикистон маълумот дода шуд.
Зикр гардид, ки тағйиру иловаҳо ба Конститутсияи кишвар ба рушди минбаъдаи равандҳои демократикунонии ҳаёти ҷомеа, ҳуқуқу озодиҳои инсон ва кафолати риояю ҳифзи онҳо, таҳкиму такмили асосҳои конститутсионии ҳокимияти давлатӣ, рукнҳои асосии он, мукаммалу самаранок гардонидани низоми мақомоти давлатӣ мусоидат мекунанд.