Нериё Аминов Тоҷикистонро ватани аслии хеш ҳисоб мекард

Душанбе, 23.05.2016. /АМИТ «Ховар»/. 29 майи соли равон дар Театри давлатии академии опера ва балети ба номи С. Айнӣ бахшида ба 100-солагии ҳунарманди мумтози сабки «Шашмақом» Нериё Аминов барномаи фарҳангӣ бо иштироки беҳтарин сарояндагони «Шашмақом» баргузор мегардад.
Саҳми Нериё Аминов дар рушди мусиқии суннатии тоҷикон-«Шашмақом» басо назаррас аст. Ӯ бо шеваи фаҳмову возеҳ ва услуби хос анъанаҳои шашмақомхониро идомаю такмил бахшидааст. Дар хазинаи тиллоии радиои тоҷик суруду таронаҳои мавсуф, аз қабили «То боди сабо», «Чи донӣ», «Зулфи парешон», «Гиря», «Хубрӯён», «Насруллоӣ», «Шаҳноз», «Даромади ушшоқ» даҳсолаҳост садо дода, хотири мухлисони ин санъати асилро шод мегардонад.
Нериё Аминов аз зумраи саршиносони санъати касбии мусиқии тоҷик ба ҳисоб рафта, қариб тамоми умри пурбаракати хешро сарфи хидмат ба мардуми Тоҷикистон намудааст. Ӯ аз 80 соли умри худ 60 соли онро дар Тоҷикистон гузаронида,  онро ватани аслии хеш ҳисоб мекард.