«Созандагони Ватан»: Ҷонибдорӣ аз тағйиру иловаҳо ба Конститутсия вазифаи ҷонии ҷавонон аст

Душанбе, 17.05.2016 /АМИТ «Ховар»/. Имрӯз бо ташаббуси ТҶҶ «Созандагони Ватан» дар шаҳри Ваҳдат таҳти унвони «Ҷавонон ояндаи миллатанд» ҳамоиши ҷавонон доир шуд.
Иштирокдорон оид ба ҷойгоҳи ҷавонон дар ҷомеа ва эътимоду боварии Асосгузори сулҳу Ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба қувваи созандаи ҷавонон сухан ронда, оид ба равандҳои муосири сиёсӣ дар ҷаҳон ва минтақа ибрози ақида намуданд.
Ҷавонон аз тағйиру иловаҳое, ки ба Конститутсияи Ҷумҳурии Тоҷикистон ворид мешаванд, ҷонибдории хешро иброз намуда, онҳоро ба манфиати худ мувофиқ донистанд ва аз ҳамаи ҳамсолони худ даъват ба амал оварданд, ки дар ин чорабинии муҳими сиёсӣ фаъолона иштирок кунанд.