«Тоҷиксодиротбонк» пардохти маблағҳои муштариёнро оғоз кард

Душанбе, 23.05.2016 /АМИТ «Ховар»/. Аз 20 майи соли равон пардохти маблағҳои муштариён дар доираи лоиҳаи музди меҳнат ба дорандагони кортҳои пардохтии ҶСК «Тоҷиксодиротбонк», ки чанд рӯзи охир мутаваққиф шуда буд, аз нав ба роҳ монда шуд.  Аз ин пас муштариён имкон доранд аз бинои Сарбонк дар доираи меъёри муайян маблағҳои худро дарёфт намоянд.
Маъмурияти муваққатии «Тоҷиксодиротбонк» бо мақсади ҳимояи манфиатҳои пасандоздорон ҳамаи имкониятҳои мавҷударо истифода бурда, дар марҳалаи аввал пардохти маблағҳои музди меҳнат ва амонатҳои муҳлаташон поёнёфтаи муштариёнро таъмин хоҳад кард.
Тавре қаблан иттилоъ дода будем, Раёсати Бонки миллии Тоҷикистон мутобиқи моддаҳои 48, 49 ва 50-и Қонуни Ҷумҳурии Тоҷикистон «Дар бораи Бонки миллии Тоҷикистон» ва бо мақсади беҳтар кардани вазъи молиявии ҶСК «Тоҷиксодиротбонк» ва ҳимояи манфиатҳои пасандоздорон ва қарздеҳони он бо қарори навбатии худ аз 18 маи соли равон дар бонки мазкур маъмурияти муваққатӣ ба муҳлати то се моҳ таъйин намуд.
Мутобиқи қарори қабулшуда ҳайати маъмурияти муваққатӣ аз ҳисоби кормандони ботаҷрибаи сохторҳои дахлдори Бонки миллии Тоҷикистон ташкил карда шуд.
Ба маъмурияти муваққатӣ дастур дода шудааст, ки фаъолияти худро дар асоси қонунгузории ҷумҳурӣ ба роҳ монда, барои беҳтар кардани вазъи молиявии ҶСК «Тоҷиксодиротбонк» тадбирҳои зарурӣ андешанд.