Вохӯрӣ: «Терроризм ва экстремизм — хатар ба амнияти ҷомеа»

Душанбе, 24.05.2016 /АМИТ «Ховар»/.  Бахши Хадамоти муҳоҷират дар ноҳияи Ашт якҷоя бо мақомоти иҷроияи ҳокимияти давлатии ноҳия дар ҷамоатҳои Понғоз, Меҳробод, Шайдон, Шодоба ва деҳаи Гулшан дар мавзӯи «Терроризм ва экстремизм-хатар ба амнияти ҷомеа», «Васеъ намудани ҳуқуқ ва имкониятҳои оилаҳои тарккардашудаи  муҳоҷирони меҳнатӣ» ва дигар масъалаҳои ҷорӣ вохӯрӣ гузаронид.
Дар вохӯрӣ бо сокинон доир ба хатарҳои шомил шудан ба ҳар гуна ҳизбу ҳаракатҳо, қоидаҳои муҳоҷирати бехатар, будубоши муҳоҷирони меҳнатӣ дар хориҷа, воридшавӣ ба кишвари қабулкунанда, тарзу роҳҳои гирифтани патент, дастрас намудани полиси суғуртаи тиббӣ, гирифтани маълумотномаи тиббӣ доир ба надоштани касалиҳои сироятӣ, тарзи супоридани тест дар марказҳои тестсупории Федератсияи Русия ва ду мактаби олии шаҳри Душанбе, ки ҳуқуқи додани сертификат доранд, маълумот дода шуд. Ба шаҳрвандони воридшавиашон ба қаламрави Федератсияи Русия мамнӯъ барои омӯзиши касбҳои замонавӣ Литсейи касбӣ-техникӣ ва Маркази таълими калонсолони ноҳия тавсия дода шуд.