5678 нафар дар вилояти Хатлон соҳиби касбу ҳунарҳои дилхоҳ гардидаанд

Душанбе, 29.06.2016 /АМИТ «Ховар»/.   Дар панҷ моҳи соли равон аз тарафи мақомоти Агентии меҳнат ва шуғли аҳолӣ дар шаҳру ноҳияҳои вилояти Хатлон  113 ярмаркаи ҷойҳои кории холӣ ва вазифаҳои озод доир карда шуд, ки дар онҳо 1072 корхонаю ташкилотҳо ва муассисаю хоҷагиҳои гуногуни вилоятӣ ва шаҳру ноҳиявӣ иштирок доштанд.
Тавре ки аз шуъбаи иттилоотию таҳлилии дастгоҳи раиси вилояти  Хатлон иттилоъ доданд, дар ин ярмаркаҳо 1350 нафар шаҳрвандон ба кор роҳхат гирифта, 1123 адади онҳоро ҷойҳои кори доимӣ ташкил медиҳад. Инчунин 1470 нафар ба касбомӯзӣ ва 436 нафар ба корҳои ҷамъиятии музднок ҷалб гардиданд.
Ҳамчунин дар доираи барномаи давлатии мусоидат ба шуғли аҳолӣ дар миқёси вилоят дар панҷ моҳи соли равон 4162 нафар шаҳрвандон ба касбомӯзӣ ҷалб карда шуданд, ки 71,7 дарсади нақшаро ташкил медиҳад. Аз инҳо 2371 нафарашон курсҳои бозомӯзиро хатм намуда, соҳиби касб гардидаанд. Дар давраи панҷ моҳи соли равон 6739 нафар шаҳрвандон хоҳишмандона курсҳои кӯтоҳмудати касбомӯзиро бо тариқи худмаблағгузорӣ хатм карданд, ки ин 50,6 дарсади нақшаи солонаро ташкил медиҳад.
Бояд гуфт, ки дар кори касбомӯзӣ ва шаҳодатномакунии малакаи касбии шаҳрвандон нақши филиалҳои муассисаҳои Маркази таълимии калонсолони Тоҷикистон дар шаҳру ноҳияҳои вилоят назаррас аст. Тавассути ин муассисаҳои касбомӯзӣ 5678 нафар шаҳрвандони вилоят соҳиби касбу ҳунарҳои дилхоҳ гардидаанд.