Ҷаҳон Султоноғлу: «Ифротгароӣ боварӣ ва эътимодро халалдор месозад»

Душанбе, 13.06.2016 /АМИТ «Ховар»/. «Ифротгароӣ боиси пайдо шудани тарсу ваҳм дар ҷомеа гашта, сулҳу субот ва амнияти давлатро аз байн мебарад, зиёда аз ин эътимоду бовариро халалдор менамояд», — чунин зикр намуд зимни брифинги матбуотӣ ёрдамчии Котиби генералии СММ, директори минтақавии Барномаи рушди СММ оид ба кишварҳои Аврупои шарқӣ ва ИДМ хонум Ҷаҳон Султоноғлу.
Хотиррасон мешавем, ки ёрдамчии Котиби генералии СММ,  директори минтақавии Барномаи рушди СММ оид ба кишварҳои Аврупои шарқӣ ва ИДМ Ҷаҳон Султоноғлу бо сафари корӣ дар Тоҷикистон қарор дошта, субҳи имрӯз дар конфронси байналмилалии «Таҳияи чорабиниҳо барои мубориза бар зидди ифротгароӣ дар кишварҳои Осиёи Марказӣ» иштирок ва суханронӣ намуд.
Ҷаҳон Султоноғлу изҳор кард, ки Барномаи рушд ҳамчун яке аз сохторҳои муҳими СММ ба масъалаи пешгирӣ аз пайдошавии ифротгароӣ таваҷҷуҳи ҷиддӣ зоҳир менамояд. Аз ҷумла, дар асоси нақшаи амали Котиби генералии СММ, идораи Барномаи рушд силсилаи чорабиниҳоро дар сатҳи кишварҳои ҷаҳон омода намудааст, ки ҳадаф аз  силсилаи чорабиниҳо бартараф намудани ифротгароӣ бо роҳи мусоидат ба рушди ҳамаи қишрҳои ҷомеа ва ҷорӣ кардани таҳаммулпазирӣ мебошад.
Мавриди зикр аст, ки Ҳукумати Ҷумҳурии Тоҷикистон чандин сол пайгирона ба муқобили пайдоиш ва паҳн шудани ифротгароӣ дар миёни ҷомеа чораҳои заруриро дар сатҳи давлатӣ амалӣ месозад.