Вохӯрии техникӣ оид ба омодасозии тадқиқоти муомилоти ғайриқонунии афюни афғонӣ дар Вена

Душанбе, 18.06.16./АМИТ «Ховар»/.  Дар  шаҳри  Вена вохӯрии  техникӣ оид ба омодасозии тадқиқоти муомилоти ғайриқонунии афюни афғонӣ аз тариқи масири шимол дар  доираи Лоиҳаи Раёсати СММ оид ба маводи нашъаовар ва ҷинояткорӣ -Мониторинги савдои афюни афғонӣ  баргузор гардид.  Дар  кори он намояндагон аз давлатҳои Осиёи Марказӣ, Федератсияи Русия, Ҷумҳурии Исломии Афғонистон, Маркази минтақавии ҳамоҳангсозии иттилотии Осиёи Марказӣ (ММҲИОМ),  ташкилотҳои байналмилалӣ ва Агентии назорати маводи нашъаовари назди Президенти Ҷумҳурии Тоҷикистон ширкат варзиданд.
Дар вохӯрӣ оид ба самтҳои интиқоли маводи нашъадор аз Ҷумҳурии Исломии Афғонистон ба воситаи дигар давлатҳои Осиёи Марказӣ  ба Федератсияи Русия, мусодираи маводи нашъадори гурӯҳи афюнӣ, ошкори ҷиноятҳои мухаддиротӣ ва оид ба вазъи нашъамандӣ дар минтақа дар муқоиса ба солҳои пешин маълумот пешниҳод намуданд.
Намояндагони давлатҳо ва ташкилотҳои байналмилалӣ  доир ба ҳалли мушкилот ва гузаронидани тадқиқоти талабот ва истеъмоли маводи нашъадори гурӯҳи афюн дар масири шимол фикру мулоҳизаҳои худро барои амалҳои оянда пешниҳод  намуданд.